3 days Ago By Fiji Sun News
E dua na i vakaraitaki vinaka e ratou vakayacora na Veitamani Kava Dealers e na nodratou tauyavutaka e dua na nodratou bisinisi me vukei ira kina na dau teitei e na kena volitaki na yaqona. Oqo na veika e vakaraitaka ko Selemo Banicau, na cauravou yabaki 29 ka cavutu mai Vusasivo, Natewa, Cakaudrove. E se qai vitu tikoga na vula na nodratou cicivaka tiko mai na bisinisi oqo, ka ratou raica ni toso vinaka vei iratou ka vakakina vei ira na dau teitei.
NAKI NI BISINISI “Na i naki levu ga ni bisinisi oqo e na nodra vukei na tu vakavanua e na so na leqa se oga totolo e dau sotavi e na vuvale se itikotiko ka dau gadrevi kina na ilavo totolo.” E vakaraitaka ni bisinisi oqo e vakatokai tiko me Veitamani Kava Dealers ka ratou qarava tikoga vakaveitamani mai nakoro. E tomana ni ra volivoli tiko ga e na vica na koro e na baravi kei Natewa ka wili kina na koro ko Dawa, Vusasivo, Nadavaci, Naqaravatu kei na so tale na koro ka tiko volekata.
“E na gauna nikua e sa levu vei ira na wekada e ra tei yaqona ka dau sega tiko na kena makete me volitaki kina na yaqona bulabula, ia keitou sa vakarawarawataka vakaveitamani me keitou tauyavutaka kina e dua na bisinisi vakaoqo me vukea e so na leqa tubukoso.” E kaya ni ra dau volia mai ena $10, $11 ka lako cake e dua na kilo na yaqona bulabula, ka so e dau vakatau ena kedra levu se bibi . Ko Ramanu Sigaobua kei na yaqona mamaca.
Tomana ni ra dau volia mai ka’ra qai mai vakasigana, ka’ra qai volitaka tale e na makete e Savusavu. Vakaraitaka ni so na gauna e sa dau yaco saraga yani kina nodra matanivale na makete ni volivolitaki se ko ira na vakamakete tiko e na makete e Savusavu e na vuku ni kena volitaki na yaqona. E kaya ko Selemo ni dua na macawa e ra rawa ni rawata toka e $5000 kina $6000 e na veika e ra rawata tale mai e na kena volitaki na yaqona kina makete e Savusavu.
E vakaraitaka ni dau nodratou tatadra tiko vakavuvale me tara vakaoti na vale, ia ka sa mani yaco vakakina na nodratou tatadra e na veika e ratou sa rawata mai e na kena vakaduri na bisinisi oqo. Na veika e ra rawata e sa tara oti kina na vale, ka vakakina e ra vakatubu ilavo talega e na Fiji Holding Unit Trust. NA DREDRE E SOTAVI Tomana ni dredre levu e sotavi tiko oya na kena dau draki suasua na vanua ka dau dredre na nodra sigana na yaqona.
Sa tiko na ituvatuva oya e na kena toso cake kina dua tale na ivakatagedegede na kena cicivaki na bisinisi me cooperative. Veivakasalataki ko Selemo vei ira na nona icaba me ra kakua ni rere kevaka e ra vinakata me ra vakayacora e dua na ituvatuva e yaga ka vinaka kina e na nodra bula ka vakakina e na kena vakaliuci tikoga na Kalou e na veigauna taucoko. Feedback: salaseini.
[email protected].
