11 hours Ago By Superbalita Cebu
Gitugotan ni Presidente Ferdinand Marcos Jr., ang mga buhatan sa gobiyerno sa pagsagop sa tunga sa adlaw nga trabaho ug work-from-home arrangement sa Miyerkules, Abril 16, 2025, taliwala sa pag-obserbar sa Semana Santa. Si Marcos nipagawas og Memorandum Circular 81, nga nagtugot sa work-from-home arrangement sa mga ahensiya sa gobiyerno gikan sa alas 8 sa buntag hangtod sa alas 12 sa udto sa Abril 16, Miyerkules Santo, ug suspension sa trabaho gikan sa alas 12 sa udto aron mahatagan ang mga kawani sa gobiyerno sa hingpit nga oportunidad sa hustong pag-obserbar sa Huwebes Santo, Abril 17 ug Biyernes Santo, Abril 18.
Ang Abril 17 ug 18 gideklarar nga regular holiday isip pag-obserbar sa Semana Santa ning tuiga. “However, agencies whose functions involve the delivery of basic and health services, preparedness/response to disasters and calamities, and/or the performance of other vital services shall continue with their operations under usual working arrangements and render the necessary services,” matod sa memo. “The adoption of work from home and suspension of work for private companies and offices is left to the discretion of their respective employers,” dugang niini.
Apan walay kamanduan bahin sa mga pribadong kompaniya. Nasayran nga dunay kompaniya nga kutob lang usab sa udto ang ilang trabaho aron paghatag og higayon sa mga kawani nga taga probinsiya nga makauli. / TPM / SunStar Philippines.
