6 days Ago By Fiji Sun News
Kevaka me da tukuna tiko ki yaloda ni da na rawa ni rawata, e da na rawata vakakina se ma ni vakacava sara na dredre e da lako curuma e na veisiga. Na veika vinaka kece e da cakava e na tiko ga kina na dredre, ia e na taudaku ni dredre oya e tiko kina na veika vinaka ka bibi me tiko vei keda na yalo ni vosota ka me da taukena tiko e na veigauna taucoko. Oqo na veika e vakaraitaka ko Alumita Nawanitu na goneyalewa yabaki 21, ka mai taura tiko na nona koroi ni ‘Bachelor of Commerce in Industrial Relations & Human Resource Management and Management e na koronivuli ni vuli torocake e Fiji National University ka vakayacori na soqo oqo e na Vodafone Arena e Suva e na tusiti ni macawa oqo.
Ko Alumita e cavutu mai Nubumakita, Nalawa, Ra, ka vasu ki Soso, Naceva Kadavu. Vakaraitaka ni marautaka ka luluvu talega e na siga oya me vaka ni vakasamataka lesu na nona susugi voli tu mai e na gauna e se lailai kina me yacova mai nikua. “Au vinakata meu vota na ivola oqo vei rau na ganequ.
“Dina ni rau sega ni tiko nikua e na vuku ni cakacaka, e na nodrau qarava tu mai na noqu vuli e na loma ni tini vakacaca na yabaki sa oti me vaka ni sa vakacegu ruarua na noqu itubutubu e na gauna au se lailai kina”. E tolu na yabaki na nona vuli tiko mai, ia e vakavinavinakataka ni sega ni yali vakadua vua na nona takete me vaka ni sa mai taura tu edai na kena icovi. Vakavinavinakataki ira talega na wekana kei ira na nona itokani e koronivuli e na nodra veitokoni e na kena sa mai rawati rawa na rawaka vakavuli ka sasagataki tu mai e na loma ni tolu na yabaki sa oti.
Tomana ni loma ni tolu na yabaki e lako curumi e levu sara na dredre e sotava e na veika vakailavo, moce vakaca kei na kana vakaca ia ni mai rawa na ivola nikua sa cavuta kina na vakavinavinaka. Sa nona ituvatuva tiko me na vakasaqara e dua na nona cakacaka me veivuke tale vei rau na ganena me vaka ni rau qarava mai na nona vuli e na gauna e sa mai takali kina ko irau na nona itubutubu. Veivakasalataki ko Alumita vei ira na nona icaba ni sega ni dua na ka e dredre vua na Kalou, ke sa tiko na yalo ni vuli kei na sasaga tovolea sara mo na rawata me vaka ni oqori e na vukea na nomu bula e na vuku ni vaqara cakacaka e na veisiga ni mataka.
Me da digia vinaka talega na noda ilawalawa ki koronivuli me vaka ni gauna ni vuli vakaoqo e dau levu kina na veitemaki kei na vakailala, ia me kakua vakadua ni yali ki yalomu na veika o sasagataka tiko mo na rawata. Feedback: salaseini.guniyaga@fijisun.
com.fj.
