Supplier og kandila nag-sideline og shabu, nadakpan

Napusasan ang usa ka 43 anyos nga supplier og kan­dila atol sa buy-bust nga gipahigayon sa mga sakop sa Philippine Drug Enforcement Agency (PDEA) Bohol Provincial Office (BPPO) sa alas 4:20 sa hapon, Lunes, Abril 14, 2025, sa Purok 5, Barangay San Isidro, Dakbayan sa Tagbilaran, Probinsiya sa Bohol. Ang nadakpan giila ni PDEA 7 Director Alex Tablate nga si alyas Randy, usa ka high value target nga nagpuyo sa maong lugar. Nakuha sa mga operatiba ang tulo ka dagkong putos sa gituohang shabu nga motimbang sa 55 gramos nga dunay estimated average market value nga P374,000, buy-bust money ug ang motorsiklo nga matod pa maoy gigamit sa pagpamaligya sa ilegal nga drugas.

Ang mga ebidensya giduso ngadto sa PNP Bohol Provincial Forensic Unit alang sa chemical analysis ug proper disposition. Matod ni Leia Alcantara, information officer sa PDEA 7, nga duha ka semana nila nga gipaubos sa case buildup ang suspek human makadawat og kasayuran gikan sa kasaligang tinubdan. Giingon’g makabaligya si Randy og 300 gramos matag semana gikan sa supplier.



Human makuha ang tanang kasayuran, gilusad dayon ang anti-illegal drug operation sa pakig-alayon sa Bohol Maritime Police, PNP Drug Enforcement Group ug Tagbilaran City Police Station. Kalapasan sa Section 5 ug 11, Article II, RA 9165 o Comprehensive Dangerous Drugs Act of 2002 ang giandam sa PDEA nga kaso batok sa suspek. / AYB.