Rockets, Hawks sulod sa semis

Kalmadong gipasulod ni Fil-Am Jalen Green ang iyang duha ka freethrows sa nahabiling 3.5 segundos aron agakon ang hosts Houston Rockets sa kulbahinam nga daog batok sa Golden State Warriors, 91-90, sa quarter-finals sa Emirates NBA Cup kagahapon, Huwebes, Disyembre 12, 2024 (PH time). Ang Rockets nga karon pa nakabawos sa Warriors sulod sa 16 ka duwa gikan pa kaniadto, ning-abante sa semi-finals diin ilang ikaharong ang Oklahoma City Thunder sa Las Vegas.

Human napasulod ni Green ang iyang nakapadaog nga freethrows, nisuway unta pag-itsa sa three-point area si Warriors guard Brandin Podziemski apan napalakan siya ni Jabari Smith Jr. Gipangulohan ni Alperen Sengun ang Rockets pinaagi sa iyang 26 puntos ug 11 rebounds, nidugang og 15 puntos si Smith Jr., nitunol og 12 puntos si Green samtang nihatag og 10 puntos si Amen Thompson.



Ang Warriors nga nakamugna og 22 ka turnovers, gipangulohan ni Jonathan Kuminga pinaagi sa iyang 20 puntos, nihatag og 19 puntos si Stephen Curry samtang nitampo og 15 puntos si Buddy Hield. Sa laing duwa, nakalupad sab sa semi-finals ang Atlanta Hawks human nila gipangpukan ang hosts New York Knicks, 108-100. Sa semis, kontrahon sa Hawks ang Milwaukee Bucks.

Gipangulohan ni De’Andre Hunter ang Hawks pinaagi sa iyang 24 puntos, nidugang og 22 puntos si Trae Young samtang niamot og 21 puntos si Jalen Johnson. Ang Knicks gipangulohan ni Josh Hart pinaagi sa iyang 21 puntos samtang ningtunol og 19 puntos matag usa sila si Karl-Anthony Towns ug Mikal Bridges. / AP.