Pagpanaghiusa alang sa mga negosyante

Usa ka makasaysayanong panagtigom ang nahitabo sa Quest Hotel, Cebu City atol sa memorandum of agreement (MOA) Signing ug Workshop niadtong Abril 2, 2025. Gipangulohan kini sa ASKI (Alalay sa Kaunlaran, Inc.) ug gisuportahan sa Coca-Cola Philippines ug mao na kini ang opisyal nga paglunsad sa bag-ong yugto sa iSTAR Center for Entrepreneurship — usa ka inisyatiba nga nagtinguha sa pagpalig-on sa micro, small, and medium enterprises (MSMEs), ilabina kadtong gipangulohan sa kababayen-an.

Ang kalihokan gisalmotan sa daghang mga partner-organisasyon nga nagpakita sa ilang bug-os nga suporta sa maong adbokasiya, lakip na ang Lamac Multi-Purpose Cooperative (LMPC), Negros Women for Tomorrow Foundation (NWTF), ug uban pa. Ang MOA Signing ug Workshop nagtutok sa digital upskilling, access sa kahimanan ug kahibalo, ug business coaching aron matabangan ang MSMEs sa pagpangita ug mas lig-on nga pamaagi padulong sa kalampusan sa ilang negosyo. Gipahigayon ang programa ilawom sa tema nga “Scaling Sustainability Mechanism of Support for MSMEs.



” Sa ilang pamahayag, giila sa LMPC ang dako nga papel sa kalihokan, ug ilang gipadayag ang ilang komitment sa pagtukod ug mas inklusibo ug malungtarong kaugmaon para sa mga negosyante, pinaagi sa lig-on nga kooperasyon sa sektor sa kababayen-an ug micro-entrepreneurs. Kini nga panagtigom usa ka panag-ingnan sa panaghiusa sa sektor pribado ug kooperatiba, nga nagtinguha sa pagpalambo sa ekonomiya ug paghatag ug dugang kahigayunan sa mga Pilipinong naningkamot sa kalibutan sa negosyo..