P7.6M ecstasy nasakmit sa Clark

Nakumpiska sa mga awtoridad ang usa ka parsel nga adunay sulod nga liboan ka ecstasy tablets nga gitago sa mga kahon sa gummy candies sa Port of Clark matod sa Bureau of Customs (BOC) sa Miyerkules, Abril 10, 2025. Ang maong kargamento nga gibanabanang mobalor sa P7.63 milyunes, gipadala paingon sa Quezon City gikan sa Brussels, Belgium.

Gi-flag kini subay sa paniktik gikan sa Airport Interdiction Unit (PDEA-AIU) sa Philippine Drug Enforcement Agency nga nag-aghat sa usa ka koordinasyon nga operasyon tali sa Customs ug daghang mga ahensiya nga nagpatuman sa balaod. Usa ka K-9 unit ang una nga nakamatikod sa presensya sa mga ilegal nga sangkap atol sa pag-inspeksyon. Kini nisangpot sa usa ka hingpit nga pisikal nga eksaminasyon diin nadiskubrehan ang pito ka kahon sa gummy candies nga nagtago sa kinatibuk-an nga 4,491 ka mga gidudahang ecstasy tablets o methylenedioxymethamphetamine (MDMA).



Ang parsel aduna sab lainlaing mga butang nga dili druga lakip ang Belgian waffle biscuits. Gikumpirma sab sa laboratory analysis nga gihimo sa PDEA ang mga tablet nga MDMA. Ang pagsakmit gihimo pinaagi sa hiniusang paningkamot sa PDEA, kapulisan, National Bureau of Investigation sa Pampanga, Department of Justice, ug mga lokal nga opisyal sa Mabalacat City.

Gidayeg ni Customs Commissioner Bienvenido Rubio ang hiniusang paningkamot ug gipamatud-an pag-usab ang pasalig sa bureau sa kampanya batok sa druga sa gobiyerno. “We will continue to pursue aggressive measures against drug smuggling while ensuring the safety and well-being of the Filipino people,” matod ni Rubio. / JGS / SunStar Philippines.