OKC sulod sa NBA cup semi-finals

Nakaabante sa Emirates NBA Cup semi-finals ang host Oklahoma City Thunder human nila gipangbuntog ang Dallas Mavericks, 118-104, kagahapon, Miyerkules, Disyembre 11, 2024 (PH time), sa National Basketball Association (NBA). Sa semis, kontrahon sa Thunder ang modaog sa laing quarter-final game tali sa Houston Rockets ug Golden State Warriors. Gipangulohan ni Shai Gilgeous-Alexander ang Thunder pinaagi sa iyang 39 puntos, niamot og 18 puntos si Jalen Williams samtang ningdugang og 11 puntos matag usa sila si Cason Wallace ug Loquentz Dort.

Igo lang naglabaw ang Thunder og tulo ka mga puntos sa halftime apan pagsugod sa 3rd quarter, hinayhinay na nga ningbulhot ang ilang opensa hangtod nga niabot sa 20 puntos ang ilang labaw, 97-77, sa sayong bahin sa 4th quarter. Human niini, wala na nakabangon pagbalik ang Mavericks hangtod na sa katapusang gutlo. Pinaagi sa ilang dekalidad nga perimeter defenders, nalimitahan sa Thunder ang usa sa mga pambato sa Mavericks nga si Luka Doncic og 16 lang ka puntos nga ubos ra sa iyang naandang kontribyusyon.



Gipangulohan nila ni Naji Marshall ug Klay Thompson ang Mavericks pinaagi sa ilang 19 puntos matag usa samtang nihatag og 17 puntos si Kyrie Irving. Sa laing bahin, nakasulod sab sa Emirates NBA Cup semi-finals ang hosts Milwaukee Bucks human nila gipanglupig ang Orlando Magic, 114-109. Ang Bucks gipangulohan ni Giannis Antetokounmpo pinaagi sa iyang 37 puntos, nidugang og 28 puntos si Damian Lillard samtang nihatag og 22 puntos si Bobby Portis.

Sa semis, sangkaon sa Bucks ang modaog sa laing quarter-final match tali sa New York Knicks ug Atlanta Hawks. / AP.