Napaslak sa trak, patay

Patay ang usa ka drayber sa motorsiklo human malatayi sa trailer truck nga nagkarga og 40-footer container van nga puno sa dagkong tubo. Ang aksidente nahitabo sa alas 12:30 sa kaadlawon, Sabado, Oktubre 19, 2024, sa Transcentral Highway, duol sa usa ka kan-anan sa Barangay Busay, Dakbayan sa Sugbo. Ang namatay mao si Steven Amodia Ompad, 23, taga sa Sityo Tongdon, Barangay Basak, Lapu-Lapu City.

Si Ompad nagmaneho sa iyang Honda Beat nga motorsiklo samtang angkas si Gerald Dignos, 18, taga Purok Kalachuchi, Barangay Looc, Lapu-Lapu, nga nakalayat atol sa impact ug naluwas. Base sa imbestigasyon sa Traffic Enforcement Unit sa Cebu City Police Office nga gikan sa bukid silang Ompad nga naglugsong paingon sa Lahug ug pag-abot sa kurbadahon nga dapit nasugatan nila ang trailer truck nga nagtungas nga gimaneho ni Elmar Lepon, 35, taga Barangay Looc, Lapu-Lapu City. Giingong nawadaan og kontrol si Ompad sa iyang motorsiklo ug nalamba apan tungod sa kakusog sa dagan nalahos nga nagbagnos sa dan ang motor kuyog sa biktima hangtod nga naabtan gikasugat sa trailer truck hinungdan nga nalatayan ang motorista nga miresulta sa iyang hinanaling kamatayon.



Ang iyang angkas, si Dignos ang abtik nga nakalayat. Matod ni Police Lieutenant Colonel Miguel Andeza, hepe sa Traffic Enforcement Unit, nga ang drayber sa motorsiklo giingong nakainom kini base sa pamahayag sa angkas nga nadala sa tambalanan. Tungod niini, nanawagan ang TEU sa mga motorista nga kon makainom, dili na magdrive aron malikayan ang disgrasya.

Ang drayber sa trak nisaysay nga hinay ra ang iyang dagan kay nagtungas ilabi na nga bug-at iyang mga karga og tubo ug nahibulong nalang siya nga may kalit nga mi paka ug sa iyang pagsusi, motorsikllo ang midasmag sa bumper ug ang drayber sa motor diha na sa ilawom. Kasamtangang gitanggong sa TEU ang drayber sa trailer truck nga si Lepon ug mag atubang og kaso nga Reckless Imprudence Resulting in Homicide and Physical Injury. VAN NALAHOS Lain disgrasya sa kalsada diin tourist van midasmag sa koral sa duha ka balay, daplin sa highway sa Barangay Granada, Lungsod sa Boljoon, Sugbo, alas 6 sa buntag, Oktubre 19, 2024 ug maayo nalang way naangol o nakalas sa maong panghitabo.

Apan, nadaot ang koral sa mga balay ni Luciana Labiste ug Janine Labide, ingon man ang Nissan Urvan van nga gimaneho ni Mel Dominique Barte, 27, ulitawo, taga Macaas, Catmon, Sugbo. Base sa imbestigasyon ni PSSg Sherwin Sejudo, Traffic Police Investigator sa Boljoon MPS, ang drayber sa tourist van nagsakay og mga lokal nga turista nga taga Manila ug gikan sa Siyudad sa Sugbo padulong sa Oslob. Matod pa ni Barte, pag-abot sa kurbadahon nga bahin sa dalan kalit siyang nakatagpilaw, hinungdan nga nasimang ang iyang gidala nga tourist van ug midiretso sa koral sa duha ka balay.

KAPITAN NADISGRASYA Kapitan naangol human ang iyang motorsiklo nga gimaneho gidaro sa laing motorsiklo alas 9:00 sa buntag Sabado, Oktubre 19 2024 sa National Highway, Brgy. Poblacion, Lungsod sa Oslob. Si Barangay Captain Lindo Maximo Gutierez Nazareno, 44, minyo taga Purok Gimelina, Brgy.

Poblacion, Lungsod sa Oslob, daling gidala sa tambalanan sa Dakbayan sa Carcar aron ipaubos sa CT scan, x-ray. Gitanggong si Rechie Montoya Sabayton, 39, ug naangol sab ang angkas niini nga si Roland Dejito Villaren, 38, minyo pulos mga local Seafarer, taga Naga City. Sa imbestigasyon ni Police Executive Master Sgt.

Archer Bijares, ang biktima nga kapitan sakay sa iyang Yamaha Mio padulong sa south nga bahin ug nagsunod niya ang usa ka Honda Click nga gimaneho ni Sabayton. Ang Kapitan mi-signal kini sa iyang motorsiko nga moliko sa wala ug matod pa nga sa iyang pagliko kalit siyang gidaro sa nagsunod. Tungod sa ka kusog sa impact natumba ang kapitan sa iyang gisakyang motorsiklo, lakip sa natumba og naangol ang nakadasmag kaniya ug pulos gidala sila sa tambalanan.

(DVG, AYB, GPL).