Nagsundo sa anak gitodas

GISUTA karon sa mga awtoridad kung unsa ang motibo sa pagpusil patay sa usa ka kanhi sundalo alas 4:30 sa hapon, Miyerkules, Oktubre 9, 2024, sa Midsayap, probinsiya sa Cotabato. Giila ang biktima nga si retired Master Sergeant Joebert Gumban, sakop sa Philippine Army ug nagpuyo sa Barangay Agriculture, Midsayap, North Cotabato. Gibutyag ni Midsayap Chief of Police Lieutenant Colonel Realan Mamon nga sakay ang sundalo sa iyang motor gikan sa ilang balay aron kuhaon ang iyang anak nga nagtungha.

Apan pag-abot niya sa utlanan sa Barangay Bual Sur ug Barangay Bual Norte, kalit lang mibutho ang duha ka wala mailhing tawo ug gipusil kini gamit ang kalibre .45 nga pistola. Abtik sab nga miikyas ang mga suspek sakay sa laing motorsiklo paingon sa hilit nga dapit sa Midsayap.



Natumba ang motor ug nadat-ugan pa ang biktima nga nakabsan dayon sa kinabuhi sa dihang nakaangkon og samad pinusilan sa ulo ug likod nga bahin sa lawas. Padayon sab nga gilusad sa kapulisan sa Midsayap Municipal Police Station ang imbestigasyon aron nga matumbok ang mga mamumuno sa sundalo. (EEF).