Mga lider mag-abot

Mga duwa karon: 5:00 pm- NorthPort batok Hong Kong 7:30 pm- Magnolia batok NLEX Magsangka ang mga lider nga mao ang NorthPort Batang Pier ug guest team Hong Kong Eastern sa premirong duwa karong Biyernes, Disyembre 20, 2024, sa Philippine Basketball Association (PBA) Season 49 Commissioner’s Cup sa Philsports Arena sa Pasig City. Ang duha ka mga kampo nagbahin sa ibabaw nga puwesto nga pulos naggunit og 5-1 nga rekord. Ang Batang Pier ningposte og sunodsunod nga kadaugan sa nag-una nilang lima ka duwa apan nasugamak sila sa surpresang pilde batok sa Phoenix Super LPG Fuel Masters, 109-114, niadtong Martes, Disyembre 17.

Alang sa scoring leader sa Batang Pier nga si Arvin Tolentino, ang maong pagkapilde magsilbe nilang leksyon hilabi na sa batan-on niyang mga kauban. “Siguro, medyo OK na rin na na-experience namin ‘yun ngayon,” matod ni Tolentino nga napatik sa www.pba.



ph. “At least na-feel namin na hindi laging panalo, alam mo ‘yun? I guess medyo nasa taas na rin kami, so back down to earth now.” Sa ilang bahin, ang Hong Kong Eastern ningrehistro sa ikatulo nilang sunodsunod nga kadaugan human nila nasinati ang bugtong nilang pilde sa komperensya batok sa Rain or Shine Elasto Painters, 81-99.

Sa main game, ang NLEX Road Warriors makigbatok sa nagsalimoang nga Magnolia Chicken Timplados Hotshots. Ang Road Warriors adunay 3-3 nga rekord samtang ang Hotshots naa sa ubos nga bahin nga nagbitbit og 1-4 nga rekord. / ESL.