Media Security Vanguards gilusad pag-usab

Gilusad pag-usab sa Philippine National Police (PNP) ug Presidential Task Force on Media Security (PTFoMS) niadtong Martes, Abril 8, 2025, ang Media Security Vanguards sa tinguha nga masiguro ang kaluwasan ug seguridad sa mga sakop sa media ilabina sa nagsingabot nga nasyonal ug lokal nga eleksyon sa Mayo 2025. Sa usa ka press conference, ang executive director sa PTFoMS nga si Undersecretary Jose Torres Jr., niingon nga ang Media Security Vanguards nga gilangkuban sa nagkalainlaing ahensiya sa gobiyerno, apil na ang PNP, Presidential Communications Office (PCO), Department of Justice, Commission on Elections, ug Department of the Interior and Local Government maoy magsilbi nga unang responders sa pag-atiman sa media practitioners, ilabina niadtong adunay mga hulga sa ilang kinabuhi.

“With the launch of the Media Vanguards initiative, we are taking significant strides toward ensuring the safety of our journalists, who play a crucial role in defending and promoting press freedom in the country,” matod ni Torres. “Your commitment to reporting the truth and your courage in the phase of adversity cannot be overstated,” dugang niya. Si Torres niingon nga maghimo sila og mga workshop ug seminar aron mahatagan ang mga tigbalita sa kahibalo ug kahinguhaan nga ilang gikinahanglan aron magpabiling luwas samtang nagtuman sa ilang mga katungdanan.



Ang Media Security Vanguards unang gilusad niadtong Enero 2022 nga nagtudlo sa PNP Public Information Officers isip focal persons alang sa media security sa tanang probinsiya ug siyudad sa tibuok nasod. Ang kalihim sa PCO nga si Jay Ruiz nibutyag nga walay natala’ng sakop sa media nga gipatay sa tibuok nasod sa miaging tuig. “According to the National Union of Journalists of the Philippines, no media person was killed in the Philippines in 2024.

That’s a major accomplishment that we should be proud of during the administration of President Ferdinand Marcos Jr.,” matod ni Ruiz. Gibutyag usab ni Ruiz ang padayon nga pakigbatok sa administrasyon batok sa fake news nga maoy hinungdan sa pagkabahinbahin sa katilingban.

/ TPM / SunStar Philippines.