Mas kasaligan, gisandigan

SuperBalita Cebu, ang unang inadlaw nga Sugbuanong Binisaya nga mantalaan sa nasod, nagsaulog karon sa iyang ika-30 nga kasumaran, Miyerkules, Oktubre 23, 2024. Sulod sa katuigan sa iyang panaw, dili tiaw ang kadaghan sa hagit nga nasugatan. Gikan sa natural nga kalamidad, pag-ubos sa nasudnong ekonomiya ngadto sa digital o social media (socmed) ug pagtumaw sa artificial intelligence (AI).

Taliwala ning tanan, ang Superbalita Cebu miharong ug nagpabiling tinubdan sa kasaligang sa mga kasayoran ug nagtanyag og kalingawan sa katawhan. Sa iyang kasaulogan, tukma ang napili nga tema - “SuperB@30: Gisandigan. Kasaligan.



” BALIKLANTAW Yano apan puno sa garbo ang pagkahimugso sa Superbalita Cebu, ang inahang mantalaan nga SunStar Cebu (English daily). Ang Superbaita Cebu naumol tungod sa lantip, pursigido ug bisyonaryo nga founder nga si Manlalaban Jesus B. Garcia Jr.

, naila usab nga JBG. Taliwala sa mga pagsupak ug kabalaka sa iyang sirkulo sa mamuhonan bahin sa naasoy nga plano , si JBG hugtanong mipadayon. Nagtuo siya nga ang inadlaw nga mantalaang Bisaya dili lang negosyo, apan kabahin sa kawsa alang sa inahang dila aron dili mamatay tungod sa agresibo nga impluwensiya sa langyaw sa lingguwahe.

Iyang nalantawan nga ang mantalaang Bisaya nga mogawas matag adlaw dako og papel sa pagpanalipod, pagpalambo ug mabalik sa pagmahal sa pinulongan. Apan gipasabot niya nga takos ang pagsagop sa internasyonal nga pinulongan isip kabahin sa kalibotanong komunidad labina sa pagbinayloay sa negosyo ug serbisyo. Tungod sa iyang phenomenal nga pagtubo sa sirkulasyon, napamatud-an ni JBG ang tanan - ang kawsa sa maayong pamahayag nga Binisaya mokita usab.

Ug ang ubang estorya kalamboan kabahin na sa kasaysayan. NAG-UNANG ALAGAD Ang nag-unang alagad o pioneering editorial staff gilangkoban sa 12 sa pipila ka editor, mga manunuwat ug mga reporter nga kasagaran gikan sa radyo. Kadaghanan kuwang sa kasinatian sa pamahayag, apan wa kini mahimong babag sa operasyon tungod sa pagtimon sa beteranong editor-in-chief nga si Manlalaban Pachico Seares, kinsa editor-in-chief sa SunStar Cebu, uban sa pag-abag sa managing editor nga si anhing Emmanuel ‘Anol’ Mongaya.

Si anhing Wenefredo Seco maoy unang Cebuano language consultant. Dihang ni-resign si Mongaya niadtong 2010, si Michelle P. So (MPS) maoy gitudlo nga editor-in-chief ning higayon sa Superbalita.

Sa pagretiro si MPS niadtong 2021, ang news editor nga si Roger E. Vallena (REV) maoy nihulip. Dihang niretiro si REV ning tuiga, ang news editor nga si Rolando R.

Morallo (RRM) maoy nahimong kasamtangang editor-in-chief. Gikan niadto ug hangtod karon, ang Superbalita nagpabiling dominante sa sirkulasyon sa mga lokal nga mantalaan tungod sa walay puas nga suporta sa mga Bisaya nga bumabasa ug advertisers. Busa sa iyang ika-30 nga kasumaran karon dili lang kini yano nga kasaulogan, apan piyesta sa dakong pagpasalamat tungod sa inyong pagmahal ug ngadto sa Kahitas-an nga nag-iwag kanunay labina usahay sa dulom nga dalan.

/ RRM.