Lolypop miangal sa pasangil sa ilang kaatbang

Si Kongresista Emmarie 'Lolypop' Quano-Dizon, Dakbayan sa Mandaue miluwat og pamahayag taliwala sa mga pasangil nga ang iyang kampo maoy nagpaluyo reklamo batok ngadto ni Mayor Glenn Bercede ug dismissed Ma­yor Jonas Cortes. Ang mga kaso may kalabutan sa usurpation of authority ug grave misconduct, nga naghatag og tensiyon sa politika sa siyudad. Sa pahayag ni Dizon niadtong Sabado, Disyembre 14, 2024, wa niya hatagi og bili ang mga pasangil, ug gipasabot nga naandan na nga ang oposisyon maoy sayon nga basulon kung adunay mga reklamo nga mahitabo.

"Naanad naman mi ana. basta ma file-an or madutlan sila og kaso, kami pasanginlan. “Pero, kato na dismiss ang usa nilang kaso sa Ombudsman ug naka-TRO sila sa Supreme Court, walay hisgot.



Kay it proves nga our Ombudsman and courts are fair and will only decide based on the merits. “Kung wala silay sala, walay angay kahadlukan. Ug naa man gani, wala sila angay basulon kung dili ilang kaugalingon.

Let us be man enough to accept accountability," sigun pa ni Dizon sa iyang post sa iyang official nga Facebook account. Ang iyang mga komento human niadtong akusasyon nga ang iyang kampo maoy nag-file sa mga kaso batok kang Mayor Bercede ug Cortes ngadto sa Ombudsman. Ang mga reklamo gi-file ni Karina Labos gikan sa Barangay Pagsabungan ug Lea May Miñoza gikan sa Barangay Lower Tabok.

Sila mipasangil nga si Bercede gitugotan si Cortes nga magpadayon sa pag-perform sa iyang mga responsibilidad isip mayor bisan pa sa suspension order nga gipakanaog niadtong Agusto 21. Giakusahan si Bercede sa pagpirma sa usa ka “Certificate of Urgency” alang sa memorandum of agreement tali sa Mandaue ug Cebu Landmasters Inc., usa ka aksyon nga giisip sa mga nagreklamo nga klaro nga pag-angkon sa awtoridad.

Apan si Bercede mitubag nga politikal ang motibo sa mga pasangil, ug giakusahan ang iyang mga kaatbang sa politika nga nagpasulabi og mga tsismis online aron maandam ang publiko alang sa posibleng suspension. “Dugay na nila kining gi-post sa social media, ug nag­hulat ra ko. Gipasa nila kini mga semana na ang milabay, ug adunay na kini docket number sa Ombudsman.

Apan hangtod karon, wala pa mi nadawat ang reklamo,” matod ni Bercede. Nagpasidaan usab siya nga kung adunay kausaban sa liderato, posible nga maapektuhan ang liboan ka mga empleyado nga job order ug pulihan og mga tao nga anaa kuno sa oposisyon. Samtang si Cortes, una nang na-dismiss tungod sa grave misconduct, gipaubos sa dugang imbestigasyon tungod sa pag-operate og batching plant nga way kinahanglang permit.

Nasundan og laing dismissal sa iyang katungdan may kalabotan sa ilegal nga appointment sa City Hall. Bisan pa sa politikal nga binasulay, nagpabilin si Dizon nga hugot sa iyang baruganan nga ang mga lider angay nga moatubang./ CAV.