2 hours Ago By Editoryal
Unsa kining confidential funds sa mga taas nga opisyal sa nasod? Nganong confidential? Dili ba sayon na hinuon kini maabusohan? Ang isyo sa confidential funds usa sa nakapasamot sa pagkasiak sa relasyon ni Pres. Ferdinand Marcos Jr., tali ni Bise Presidente Sara Duterte tungod sa imbestigasyon sa Kamara sa confidential funds sa opisina sa naulahi sa tuig 2022 ug 2023.
Apan ang nakaalegre, ang Commission on Audit (COA) padayon pa nga nagsusi niini. Busa asang dapita sa pagsusi sa COA nga magamit sa mga kongresista para ‘in aid of legislation’ o pagpanday og balaudnon? Kay kon dili madugtong kini sa tahas sa Kamara ngadto sa pagpanday og balaudnon ang maong imbestigasyon, sakto si Sara nga sama sa kabahin lang sa paggukod kaniya o pulitika. Kon dunay babag ang balaod sa pagbutyag sa mga gigastohan gikan sa sa gitawag og confidential funds, simple ang solusyon, nganong dili na lang wad-on o undangon ang budget ubos sa confidential funds.
Sa pagkakaron, dakong kuwestiyon kini sa saad nga transparency ug accountability sa mga dakong opisyal sa nasod. Dili ba lakip si Presidente Marcos Jr., dunay confidential funds? Isip pangulo sa nasod, seguradong mas dako pa kini nga kantidad kon intandi sa Bise Presidente ug ubang opisyal.
Kay kon ang pagka-confidential sa maong pundo dakong babag sa sihag nga pagdumala sa kagamhanan subay sa ilang pag-utingkay sa buhatan sa Bise Presidente, mas dalaygon kon dunay magbabalaod nga mopasaka og balaudnon sa pagwagtang na sa maong pundo. Segurado supak ang mga hingtungdan opisyal apan dako kini nga hagit sa atong mga representante ngadto sa Kamara o Ubos Balay-Balauranan, subay sa pag-utingkay sa maong pundo sa buhatan sa Bise Presidente. Ang confidential funds minilyon kini gikan sa panudlanan sa kagamhanan, buhis sa katawhan.
Busa dili kini angay itago gikan kanato..
