Binghay: Una mosalop ang adlaw sa dayon

Nakabantay ka ba nga kung magka-anam na og ka edaran o duol na ma senior citizen, mas mosamot ang pagka-luoran? Kung nakamatikod ka ini, dili kini angay ikabalaka kay normal man kini nga cycle ug dynamics sa kinabuhi nga atong ma-agianan sa katiguwangon. Matod pa bitaw sa iningles, ‘whether you like it or not, aging is inevitable’ pasabot nga di kapugngan ang pagtaas sa atong ead. Ang uban nakasinati nga nanglayas o misibat na diay sa ilang panimalay ilang lolo, lola o ba kaha ginikanan kay wa madiparahi nahi-ubos o nangluod na diay dihang nabanghagan.

Unsaon man nato pagsukli o pagpakita ang tanang nabuhat ug natabang pagmatuto ug padako nato? Unsaon man nato pagpakita ang atong pagpahal ug atiman sa atong mga katiguwangan? Kung naa nagpuyo sa inyo, dak-a imong dunggan sa pagpaminaw. Tabangi sila sa ilang mga gin­buhaton ug nandang tulumanon. Padak-a sab imong dughan sa pagsabot ug pasensiya.



Ayaw pagmakuli og pakita sa imong pagbati sama sa paghalog o halok. Respituhi iyang opinyon bisag nagbangi pa kini sa imo. Tudlui sab kung unsaon paggamit sa mga bag-ong tek­nolohiya o modernong kahimanan sama sa cellphone, ipad, lakip pag-gamit sa mga social network sama sa FB apil pag-operate sa remote control sa telebisyon para makatan-aw sa ilang gisuod nga telenovela o salida.

Lutu-i sa iyang mga paboritong sud-an ug isuroy panagsa. Ubani sab kini sa iyang regu­lar nga pa check-up ug bisita sa iyang doktor. Kung tua sa layo, tawgi o pangumustaha.

Pangita-i og panahon nga makabisita unya mas maayo nga duna kay dad-on nga pagkaon nga iyang paborito o maghimo og mga kalihukan nga makalingaw niya sama panaglit sa pagduwa og tong-its. Ipahimamat sa ubang mga seniors ug kanhi mga higala o silingan unya enganyuha og mga hobbies sama sa gardening, ehersisyo, bingo kauban ang ubang seniors. Suporta-i financially kung di na kaya sa ilang bulsa ang gastuhan.

Katapusan, i-ampo nga ka­nunay silang magmalipayon ug maayo ang ilang panlawas..