Alangiing nga panahon masinati

GILAUMAN nga ang Davao Region makasinati og mga epekto sa Easterlies karong adlawa, Biyernes, Enero 24, 2025, sumala sa Philippine Atmospheric, Geophysical and Astronomical Services Administration (Pagasa). Ang maong hangin, nga nagagikan sa Pacific Ocean, maghatud og alangiing nga kondisyon sa lugar. Gibanabana sa state weather bureau nga ang Easterlies moresulta sa pagpanag-om sa kalangitan uban ang katag-katag nga pag-ulan ilabi na sa hapon ug gabii.

Ang igang nga temperatura, ubanan sa localized thunderstorms, moresulta usahay og kusog nga mga pag-ulan, ilabi na sa mga daplin sa mga baybayon ug ubos nga mga lugar sa rehiyon. Mga molupyo sa Davao City, Davao del Sur, Davao del Norte, Davao Oriental, Davao de Oro, ug Davao Occidental gitambagan nga makisayud sa katikaran ug mohimo og "necessary precautions," ilabi na sa mga panhon nga kusog ang ulan. Ang Easterlies gilauman nga molungtad sa tibuok adlaw, magdala og typical tropical weather nga kondisyones, Uban ang pipila ka lugar nga posibleng makasinati og mas taas nga "humidity levels.



" Mga awtoridad nag-awhag sa publiko nga magpabilin nga mainampingon bahin sa posibleng kalit nga pagbaha ug landslides sa kabukiran sa rehiyon atol sa kusog nga ulan. Ang rehiyon gidasig sab sa pagpangandam sa usab-usab nga kondisyon sa panahon kay ang maong hangin magpadayon sa pag-impluwensiya sa klima sa tibuok habagatang Mindanao. Magmonitor ang Pagasa sa mga katikaran ug magpagawas og abiso kung gikinahanglan.

Sa pinakaulahing weather update gikan sa ahensiya, way Low Pressure Area (LPA) ang namatikdan sa Mindanao. (David Ezra Francisquete).