Ai sevu mai na vuvale me tauri vola

E dua na siga marautaki vei Sharon Kelepi kei na nona vuvale e na nona sa mai ciqoma rawa na ivola ka sasagataka tu mai e na loma ni tolu na yabaki sa oti. E sega ni rawarawa na sasaga me vaka ni da na lako curuma e levu sara na dredre e na kena sagai tikoga me vakavotukana na tatadra vinaka oqo. NA TATADRA Na cakacaka oqo e se nona tatadra tikoga mai ni se lalai, ia nikua e sa mai vakadinadinataka na vua ni nona sasaga.

E cavutu mai Qamea, Taveuni ko Sharon ka vasu ki Lovoni, Levuka, Ovalau, ka mai taura tiko na nona koroi ni ‘Bachelor of Commerce in Economics and Finance’ e na koronivuli ni vuli torocake e Fiji National University ka vakayacori na soqo oqo e na Vodafone Arena e Suva e na tusiti ni macawa oqo. Ko Sharon e matai ni gone kina nona vuvale me tauri vola kina dua na koronivuli ni vuli torocake vakaoqo ka vakaraitaka ni dua na mata ni katuba vinaka e sa dolava rawa kina vuvale ka vakakina vei ira na tacina e ra muri tiko mai. Vakaraitaka ni ratou gole sara mai ki Taveuni na nona vuvale me ra mai tikoga ena na soqo lagilagi ni tauri vola ena siga Tusiti.



Na ivola e mai ciqoma e sa vota sara vakabibi vei rau na nona itubutubu e na vuku ni kena cuqeni tikoga mai na vuli mai na loma ni vica na yabaki sa oti me yacova mai nikua. “Me vaka ni dau teitei tu ga na turaga na tamaqu mai nakoro, au sa dau tatadrataka tu ga meu vuli ka me rawata e dua na noqu cakacaka meu vukei rau tale kina na noqu itubutubu”. VEIVAKADRETI MAI VEI RAU NAI TUBUTUBU Sa dau vakadreti koya tikoga na nona itubutubu me vosota tikoga na dredre e sotava, biuta laivi na yalo ni veilala ka vakabibi e na nona vakararavitaka tikoga na nona bula vua na Kalou e na veisiga.

Tomana ni levu na dredre e dau sotava me vaka na kana vakaca kei na moce vakaca, so na gauna e dau dredre na kena vakau mai na isau ni curucuru mai nakoro, ia e sa vosota tikoga na veidredre kece oya me vaka ni na cava mai ena dua na siga. Sa tatadrataka tiko me na vakaraica e dua na nona cakacaka ka me vukei rau kina na nona itubutubu ka vakakina na tacina e na veika vakailavo. Veivakasalataki ko Sharon vei ira na nona icaba me ra toso tikoga ki liu ka vakabibi me da masulaka tikoga na noda bula e na veisiga me vaka ni da na sotava vakalevu e so na veitemaki kei na veilala e koronivuli ka vakakina me da vakarorogo vakalevu vei ira na noda itubutubu e na veigauna taucoko.

Feedback: [email protected].

fj.